ALmasry-ALmohager

رئيس التحرير : سامي حنا عازر

تأريخ اليوم

 

Editor in Chief: Sami H. Azer,  ESQ

E-Mail: judgesami@ca.rr.com

رقم العدد:  60                          15   ديسمبر/كانون الاول 2012

 
 

December  15th  2012                             Issue Number: 60

 

                 جريدة أسبوعية الكترونية تصدر كل يوم سبت  من لوس انجلوس .... أول  جريدة  مصرية  اون  لاين  تغطي اخبار  المهاجر المصري وشقيقه في الوطن  ...بيت لكل مهاجر في اي بقعة من بقاع العالم .. رأى لكل المهاجرين  

 

تنويه: هذه الجريدة لخدمة الجالية المصرية .. وتتقبل هبات من أعضاء الجالية من وقت لآخر

  ALmohager

English

 

الصفحة الرئيسية

رسالة من المحرر

مقالات حرة

الكتــــــــــاب

الأدب

علـــوم

أخبار الجالية

رحلات وتاريخ

الارشيف
آراء وتعليقات
هدايا لخدمة الجالية
أتصل بنا
The Conciliator
الرجوع للعدد الحالي
 
 

كُتّاب

المصرى المهاجر

 

 
من أجل هذا نؤيد مرسى


اضغط هنا

أ/فاطمة ناعوت
 

مصريون في واشنطن يهتفون بسقوط المُرشد


اضغط هنا

د/سعدالدين ابراهيم
 

الإعْـــلام.. واللـي عَلَّمـُـــووه
والعِجل .. واللى دَبَحــــــــــووه !!

اضغط هنا

أ/صلاح إدريس
 

بغدادية

 

اضغط هنا

أ/عبدالواحد محمد
 

وأسقط الفاشيون دولة القانون

 

اضغط هنا

ا/جورج فخري
 

قبل أن تقبلوا التهانى
الفرق بين الصواب والخطأ
 

اضغط هنا

رئيس التحرير
 
 

مساحة أعلانية

 

ضع أعلانك هنا

 

 
 

الاستاذ/ صلاح إدريس

كاتب حر ورجل أعمال

salahedris@gmail.com

السيرة الذاتية..أضغط هنا

صلاح إدريس

 

الإعْــــــــــــلام.. واللـي عَلَّمـُـــــــووه
والعِجل .. واللى دَبَحـــــــــــــووه !!
 

السبت،  15 ديسمبر/كانون الاول  2012

  

تُحاصِر كتائِب الشِيخ حَازم القسَّام ، مَدِينة الإنتاج الإعلامي !! ليه يامَوْلانا ؟ لأنها قنوات كَفَرَة ، مأجُورة ، إمبريالية مُتعَفِنة ، تتلقىَ الأموال والتوجيهات من الخارج لِهَدم أصُول الدَولة!! وإسقاط الرئيس المُسلم ..والقضاء على الإسلام !! ونشر الكُفر والفجُور بين الناس !!!!

أستنى .. أستنى شِويَّة ياشيخنا .. مش هى دِى بَرضُه القنوات اللى كنت بتنُط من وَاحدَة فيهم للتانية ، للتالتة فى يُوم وَاحد !! أيام ماكنت مُرشَحاً لِلرئاسة ؟ وهىَ نفس القنوات اللى كُنت أنت وقِيادات الجماعة بتشِيدُوا بيها ..وتسعُوا بكُل الطرق علشان تِطلعُوا على شاشاتها ؟ وهى نفس القنوات اللى قدمت كل المُرَشحِين لِلرئاسة للناس بكل حِياديَّة وشفافِيَّة ؟ وهى نفس القنوات اللى مَهْدَت للثورة .. وعَرَّفت الناس بها .. وألقت الضوء عليها حتى إكتملت ..وبالأمَارَة وَقتها كُنتم مِسَمينها القنوَات الثوريَة .. وتليفزيون الثورة ؟ إيه بَقى اللى حَصل ؟ وخلاكم تقلبوا عليهم القلبَة السُودة دِى ؟

اللى حَصل أن هذه القنوات أستنفذت أغراضها خلاص !! والثورة أنتهت وماحدش يجيب سِيرتها غيركُم .. ( مع إنكم ياأخى آخر ناس شاركتُم فى الثورة .. وأول ناس بتخلعُوا لما الثورة تِتعارض مع مصالِحكُم !! ) ..والقنوات دِى دِلوقتِ هى اللى بتفضحْكُم .. وتُظهر نِفاقكُم .. وكِذبكُم .. وأخطائِكُم .. وحتى لما بتناقش أخطائِكُم بتستضيف وَاحِد منكم للرَد والشَرْح .. وسُبحان الله يامَوْلانا إن كل ضُيوفكم فى القنوات دِى بيغيُّرُوا فِكر المُشاهد تماماً ..ويجعلوه ضِدكُم لآخر الخط بعد أن كان على الحِيَاد أو مُتعاطِفاً معكُم .. (طبعاً أعضاء جماعاتكم خارج الحِسبَة .. لأنهم جُنودِكُم على الأرض .. ولاغيين دِماغهُم خالص .. ومايعرفوش غير السَمْع والطاعَة .. وتأييدكُم ظالِمين ومَظلومِين!! ).. والقنوات دِى دلوقتِ هى المِرايَا اللى بتعكس كل اللى بيحصل فى الشارع المصرى .. بكل شفافِيَّة وصِدق ، سَواء معاكُم أو عليكُم .. لكن أنتم عايزينها معاكم بس .. ولأنكم بتمضوا كل كلامكُم بعبارة بما لايُخالف شَرْع الله .. وبما أن شَرْع الله أساسُه العَدل يبقىَ العَدل هنا إن القنوات دِى لازم تقدم الرَأى والرأى الآخر .. المُؤيد والمُعارض .. وهو دَه اللى بتعمله القنوات الخاصة بالضبط .. ولكنكُم هنا مش عايزين شَرْع الله .. وعايزين شَرْع الجماعة اللى هو ( لو أنت مش معايا .. تبقى ضِدى وعَدِوى !! )

العالم كله بيعترف بريادة الإعلام المِصرى الخاص .. ويُشِيد بدُوره الهَام قبل وأثناء وبعد الثورة ، ونجاحَهُ مُنقطِع النظِير فى تعريف المِصريين بحُقوقهم ، ووَاجباتهم .. وتثقيفهُم سياسياً ، بمناقشة كل أمور الدولة بخبراء مُتخصصين فى كل المَجالات .. مما نقل 90% من المِصريين إلى خانة السِياسِيين .. وأصْبَحت تستمع لِنقاشات وَاعيَة ، وفاهِمَة ، فى التِرام ، أو على القهْوَة ،أو من سائق التاكسِى ، أو حتى سِت بيت ماكانتش تِعرف قبل كِده غير وَصْفة المَحشِى ، ودِقيِّة الباميَة ..وإزاى تِحْمِى عِيَالها ، وتأكّلهُم ، وتنيّمهُم !! دلوقتِ بتكلِمَك فى السِياسَة .. والدُستور، وأزمة مِياه النِيل كَمان!!

وأوعَى تقوللى أصل كل الإعلاميين دوول فلول ؟ ياحبيبى كلنا فلول !! وأنتم أول من أتفق ، وشارك ، وعَيِّن الفلول !! وحتى لو كان فيه تلاتة أربعة خمسة سبعة ( على رأى الريس ) .. كانوا فى حُضن النظام السابق .. وتعاطفوا مع مُبارك فى خطابه قبل الأخير .. وبعضهم بكىَ حزناً وشفقة عليه !! مش هو ده وقتها كان شعوراً عاماً لِمَلايين من المِصريين الشُرفاء .. ولا يَعنى الإعلاميين دُوول مش مِصريين ، ولا من لحْم ودَم زى بَقيَّة الناس !! المُهم إنهم بعد كِدَه .. وبعد ماعرفوا ( عن طريق الإعلام الحُر الخاص بَرضُه ) بَلاوى مُبارك وعصابته .. من قتل ، ونهب ، وسَرقة ، ومَحسوبية ، وفساد .. فرَجعُوا عن رَأيُهم ..وأعادوا التفكير فى مَواقِفهُم .. ورَأوا الحق حقاً فأتبعُوه ..

اللى يزعلك هو من رَأى الحَق فأتبع حاجة تانية خالص .. لأن الحَق دلوقتِ مش فى صالحُه .. وأنت ياشَيخ حازم القسَام الشهير بأبواسماعيل قبل 3 شهور فقط كنت بتهاجم مُرسى والإخــــــــــوان ( وفيديُوهات اليُوتيوب شاهدة على ذلك..لو نسَيْت!! ) .. لكن دلوقتِ بعد ماطِلعت المُسوَدة الأخيرة للدُستور .. وفى بَند حازم أبوأسماعيل بالدُستور أصبح من حَق من كان أحد أبويه أجنبياً أن يترشح للرئاسة .. ( مع إنهم مَمْنوعين من التمَلُك فى سَيناء .. حاجة غريبة مش كِده ! ) .. المُهم إنك يا حازم لازم .. أو لازم حازم !! .... شعرت إن البِليَة حاتلعب .. ولازم تجهز لها من دلوقتِ .. سَواء للرئاسة أو لمجلس الشعب اللى حايقف فى ضَهرك .. وأول حاجة تعملها إنك تحافِظ على الدُستور بمسوَدته الحالية ، بكل ماتملك من قوة ومن عَشيرة .. لأنه ببساطة فى صالِحك .. وعلشان أنت عارف مِقدارك، عند أصحاب العُقول من الليبراليين وغيرهم ، من القوَى السياسية ، والملايين من مُؤيديهم .. فالأسهل والأفضل لك أن تضمن من الآن أصوات الإسلاميين بكل طوائفهم .. الإخوان ، والسلفيين ، والحازمين ، والجهاديين ، وغيرهم من قوَى الإسلام السياسى .. لأنهم فصائل مُنظمَة ، ومَعروفة ،ومَضمونة .. والأهم إنها بتسمع الكلام وتنفذه فوراً .. يبقى لازم تبيّن كرامة .. وتلعب بالشَرع والشريعة .. وتتهم الغِير بالكُفر .. وتؤيد دُستور المُسلمين!!.. وتُنبذ دُستور الكَفَرَة الزنادِيق .. وعلشان تِكمَل اللِعبَة ونكسب تعاطف كل قوَى الإسلام السياسى ومُؤيديهم يبقىَ تُلقى باللوْم على الإعلام ، والإعلاميين المُفسدين .. وتقول إنهم السَبب فى كل اللى بيحصل فى مصر .. وكأن الإعلام لازم يتكلم بلِسان الحاكِم ورجاله .

أنت عارف عدد القنوات الخاصَّة اللى بتناقش السِياسَة واللى مَحسوبة على المُستقلين لاتتعدَى الـ 7 قنوات .. وعدد القنوات الدينية المُؤيدَة لمُرسى والإسلام السياسى أكثر من 52 قناة .. ده غير قناة مِصر 25 .. ومِصر 25 +الشهيرة بالجزيرة !! .. دَه غير أكتر من 35 قناة مِصريَة مَمْلوكة للشعب المِصرى كله فى مَبنىَ أسمه (تليفزيون الإخوان ــ ماسبيرو سابقاً ) وكلها بتتكلم بلِسانكُم .. ومابتستضيفش غير رجالتكم .. ومابتمدَحش غير فيكُم ..ومابتكَفرش غير مُعارضِيكم .. رَغم إنه أخيراً .. وأخيراً جداً ، إعلاميى التليفزيون المِصرى عبَّرُوا عن إحتجاجهم وغضَبهم .. بوقفة ، وإعتصام ، وبيانات من أمام مَبناهُم .. وماعملوش كِدَه ياعينى إلا بعد ماطَهقوا .. وروُحهم بَقت فى مَناخيرهُم ، والهَمّ طالهُم كلهم .. ومافيش وَاحِد منهم بيقدِم فى التليفزيون أو بيقول اللى عايز يقوله .. فكل اللى بيقوله هو كلام رؤسائه ، ورؤسائهم ، ووزيرهم وجماعته .. حتى الضيوف لازم يتاخد بيهم إذن من الوزير .. واللى زاد وغطىَ عليهم إن المصريين كلهم كانوا غضبانين منهم ..زعلانين إن تليفزيونهم ، اللى بفلوسهم ، وشَقاهم ، وتعبهم فى وادى تانى خالص ، غير وادى مصر واللى بيحصل فيها .. فكان لازم يصرخوا بأعلى صوت علشان يعبَّروا عن نفسهم .. ويقولوا أن وطنيتهم لاتقل عن أى مصرى .. واللى هم فيه دَه بَلوى وأتحدَفِت عليهم .. ويتم تهديدهم يومياً فى مَعايشهُم بالخصْم ، أو الإيقاف ، أو العَزل ، أو الفصل .. ومع ذلك فإننى أتوقع تصعيداً أعلىَ لهؤلاء الإعلاميين .. ولكن رغم كل دَه فالتليفزيون المصرى بقنواته الـ 35 مازال هو تليفزيون الجماعة !! بس مش حايطوّل لغاية مايرجع لملاكه الحقيقيين ( الشعب المصرى ) .

ونسيت ، أو تناسِيت ياشيخ حازم القسام وكتائبك إن القنوات الخاصَّة دى هى اللى بتصْرِف على ماسبيرو ، وعلى كل القنوات المصرية .. والدليل إننى أتحداك أن تلاقى إعلان واحد مَدفوع الأجر على أى قناة مصرية غير خاصَّة .. فإذا ماكانش فيه إعلانات حتى فى شهر رمضان يبقى بيصرفوا منين ؟ أقولك أنا ياحاج : بيصرفوا من ضرائب وإيجارات الأستديوهات بمدينة الإنتاج اللى أنت محاصرها دلوقت !!( ومش هاين عليك تديهُم حِتتين لحْمَة من اللى بتدبَحها على بابهُم ) .. ملايين الجنيهات شهرياً بتتصرف رواتب ومُكافآت على العاملين فى تليفزيون الإخوان ..اللى مابيتفرجش عليه غير الطبقة الدنيَا اللى تحت خط الفقر بكتير وماعندهُمش دِش .. أو وَصْلة .. فيضطروا ياولداه برؤية طلعِتكم البَهيَة أنت وجماعتك وجماعات شِبه جماعتك .. ومايسمعوش غير رأيكم .. ووجهة نظركم.. ومايشوفوش غير حُشودكم ..ودُقونكم ..و زبايب جباهِكم .. وكلام كله فى السياسة ، ووسطه آية ولا أتنين تخدم أهدافكم .. لكن مش شَرح للدين .. وحديث عن الرسول صلى الله عليه وسلم وصحابته .. وإتخاذ القدوَة والمَثل من القرآن والسُنة .. لأ يامولانا أنتم تستخدمون الدين فيما تحتاجونه من بُرهان على كِذبكُم .. فتبترُون الآيات .. وتقصِفون الأحاديث ..وتقولون حقاً يُراد به باطل .. وكل مايهمكُم هو هدفكم ، ومصالحكم ، وكراسيكم ، وحُكمكم ، وفخفختكم !!

أخيراً عايز أقولك ياشيخ حازم أنت وجماعتك وباقى جماعات الإسلام السياسى .. إنكم لازم تتأكدوا إن المصريين لما كسروا حاجز الخوف مع ثورة يناير .. كسروا كمان حواجز السلبية .. والجهل السياسى .. وشغل البغبغانات ..ومش حايسمحوا أبداً بتكمِيم الإعلام اللى نَوَّر بصائرهُم .. وبيقولوا أنهم قريب قوى قوى حايحرروا الإعلام المصرى .. والتليفزيون المصرى بكل شاشاته حايكون إنعكاس حقيقى للشارع المصرى ، بكل طوائفه وإتجاهاته . أنتم يامولانا الوِد وِدُكُم أنكم تِحيُوا إعلام قريش .. وتبقى قناة واحدة على التليفزيون المصرى .. بتذيع خُطب الرئيس وصَلواته .. وحديث الثلاثاء للمُرشد.. وخطبك ومَواعظك .. وتوجيهاتك الأسبوعية .. ويدير القناة خالد عبدالله .. ويدير حِوارات المساء والسياسة أبوإسلام !!

وعلشان أجيب لك من الآخر فإن بعض القنوات الخاصة بدأت بالفعل فى الترتيب للبث من خارج مصر .. وعلى أقمار أخرى غير النايل سات .. وساعتها وَرّونا بقى حاتوقفوهم إزاى .. وتحاصروهم إزاى .. والمشكلة إنكم ساعتها مش حاتلاقوا طريقة تدبحوا بيها عُجولكم على أبوابهم ، وريحة الشوى توصل لنخاشيشهم وهم فى استديوهاتهم .. ( ودى فى الحقيقة أكتر حاجة مزعلاهم .. إنهم ماداقوش اللحمة المشوية بتاعتكم ) .. ولما القنوات دى تطلع بَرَّه مصر عايزين نشوف بقى مين اللى حايصرف على التليفزيون المصرى وآلاف العاملين (العاطلين ) فيه ؟ .. وعايزين نعرف الخسائر اللى بمليارات الدولارات سنويا اللى حايتحرم منها النايل سات .. عيبكم أنكم مابتفكروش أبداً إلا تحت رجليكم .. وعايزين المصريين يرجعوا ياخدوا أخبار بلدهم من البى بى سى ، والتليفزيون الإسرائيلى ، والأمريكى زى ماكنا بنعمل فى الستينات والسبعينات ..وساعتها لاتلوموا إلا أنفسكم !!

ختام المشهد إن المقال سينشر يوم السبت 15 ديسمبر يوم الإستفتاء على الدُستور ..وبعض مواد الدُستور تلف وتدور وتتوافق مع رغبة المُشير أبواسماعيل القسَّام وجماعاته المُختلفة .. بتجريم مايُذاع ومايُنشر من الإعلاميين والصحفيين وعدم إلغاء عُقوبة الحبس .. يعنى التكميم قادم لامُحالة لو قلنا نعم للدستور المَشئوم .. ده غير مواد كتيرة ( أكتر من 30 مادة ) تتعارض مع الحريات وحُقوق الإنسان والمرأة ونظام الحُكم .. ولم يعطونا الوقت الكافى لتعريف الناس بتفاصيل هذا الدُستور ودهالِيزه الكتيرة والمُتشعبة ..

عزيزى القارىء ..أنا عايز أقولك حاجة واحدة بس .. وأنت رايح تستفتى على الدُستور لازم تحُط فى دماغك إن الدُستور ده أساس البيت اللى حانسكُن فيه كلنا ..و (نعم) معناها إنك بتبنى أساس مِخَوَخ وضعيف وممكن يتهد فوق راسنا كلنا ..والتصويت بـ (لا ) معناها إنك بترفض البيت الضعيف التعبان المهزوز ..وعايز تبنى أساس قوى لبيت كبير و متين ، يسَعْنا كلنا.. و يستحملنا كلنا أحنا وعِيالنا وأحفادنا لمِئات السنين .. ولا أملك هنا إلا قول الله سبحانه وتعالى :ـ

بسم الله الرحمن الرحيم

((َأوْ كَظُلُمَاتٍ فِي بَحْرٍ لُجِّيٍّ يَغْشَاهُ مَوْجٌ مِنْ فَوْقِهِ مَوْجٌ مِنْ فَوْقِهِ سَحَابٌ ظُلُمَاتٌ بَعْضُهَا فَوْقَ بَعْضٍ إِذَا أَخْرَجَ يَدَهُ لَمْ يَكَدْ يَرَاهَا وَمَنْ لَمْ يَجْعَلْ اللَّهُ لَهُ نُورًا فَمَا لَهُ مِنْ نُورٍ))

صدق الله العظيم (النور/ 40 )

   
صـــلاح إدريـــــــــس
salahedris@gmail.com

مدون بالبلــدى الفصيـــــح
تشريفكم لمدونتى يسعدنى .. ويمتعّكم ، وقد يفيدكم
http://plackprince.blogspot.com/

 

 

 

 

 

 

 

  الرجوع إلى الصفحة الرئيسية

ALmohager_ALyoum

 

ان اردت أن تكون قويا استعمل..

http://superfitnessxl.com

 
 
 
 
 
 

لكل طلباتكم العقارية اتصلوا ب هانى عازر

Call (310) 507-4077

 

 
 
 
 
 
 
 

بيروت تايمز

 

اخبار لبنان

والجالية العربية

فى

www.beiruttimes.com

 

مساحة أعلانية

 

ضع أعلانك هنا

 

 

 

 

Copyright  2009 Almohager ALmasry. All rights reserved.

Site Designed by Media Center