ALmasry-ALmohager

رئيس التحرير : سامي حنا عازر

تأريخ اليوم

 

Editor in Chief: Sami H. Azer,  ESQ

E-Mail: judgesami@ca.rr.com

رقم العدد:  57                          24   نوفمبر/تشرين الثاني 2012

 
 

November  24th  2012                             Issue Number: 57

 

                 جريدة أسبوعية الكترونية تصدر كل يوم سبت  من لوس انجلوس .... أول  جريدة  مصرية  اون  لاين  تغطي اخبار  المهاجر المصري وشقيقه في الوطن  ...بيت لكل مهاجر في اي بقعة من بقاع العالم .. رأى لكل المهاجرين  

 

تنويه: هذه الجريدة لخدمة الجالية المصرية .. وتتقبل هبات من أعضاء الجالية من وقت لآخر

  ALmohager

English

 

الصفحة الرئيسية

رسالة من المحرر

مقالات حرة

الكتــــــــــاب

الأدب

علـــوم

أخبار الجالية

رحلات وتاريخ

الارشيف
آراء وتعليقات
هدايا لخدمة الجالية
أتصل بنا
The Conciliator
الرجوع للعدد الحالي
 
 

كُتّاب

المصرى المهاجر

 

صهيون صاحب القصيدة الأسوأ

اضغط هنا

أ/فاطمة ناعوت
 

الإخوان، وحماس، ودولة الخلافة


اضغط هنا

د/سعدالدين ابراهيم
 

أنا مِصــرى جـدااااااً


اضغط هنا

أ/صلاح إدريس
 

أبو رامي وليالي رام الله الرياضية (1)

 

اضغط هنا

أ/عبدالواحد محمد
 

هارمونيات دون كيشوتية مُستثورة

 

اضغط هنا

ا/جورج فخري
 

مرسى الهادئ .. ومرسى المندفع

 

اضغط هنا

رئيس التحرير
 
 

مساحة أعلانية

 

ضع أعلانك هنا

 

 
 

الاستاذ/ صلاح إدريس

كاتب حر ورجل أعمال

salahedris@gmail.com

السيرة الذاتية..أضغط هنا

صلاح إدريس

 

أنا مِصــرى جـدااااااً

 

السبت،  24 نوفمبر/تشرين الثاني 2012

    سَيناء أول .. وتانى .. وتالت .. وطُول ماالفَرح شغّال ..

كان المفروض الأسبوع ده أتكلم عن فاجعَة أسيوط .. أو فاجعَة غزة .. لكن قلبى مَوجُوع قوى .. والكلام دلوقت حايتعبنى وحايتعبكم زيادة .. علشان كِدَه حاأكلمكم عن مُصِيبة تانية من المَصَايب اللى نازلة ترّف على سَيناء .. ولأن حُكومِتنا هى المَصدر الرئيسي للمَصايْب  فقد أصدَرَت  حُكومِتنا الرَشِيدَة ( ولو إنى شَاكِك فى إنها بَلغت سِن الرُشد !! ) .. فى ليلٍ بَهيم .. والناس نِيَام ، مَرسُوم بقانون يزيد من خراب سَيناء ..وتفريغها من المِصريين !!

     أصدَر رَئيس الوزراء قرار رقم 959 لسنة 2012  بإصدار اللائحة التنفيذية للمَرسُوم بقانون رقم 14 لسنة 2012 بشأن التنمية المُتكامِلة لِشِبه جَزيرة سَيناء .. والمَنشُور فى الوَقائِع المِصريَة  فى 13 سبتمبر 2012 .

       المَواد المَشئومَة  هى أرقام ( 7 ــ 8 ــ 30 ــ  33) .. بتقول إيه بَقى المَواد الأربعة دِى ؟

 بتقول إن المِصرى اللى مَعاه جنسِيَة تانية بالإضافة للمِصرية ، لايَحِق له التمَلّك لأى شَىء فى سَيناء .. والمِصرى من أم أو أب غير مِصرى أيضاً لايَحِق له التمَلّك فى سَيناء .. و أيضاً المُتزوِج من أجنبيَّة .. والأبناء من أى هؤلاء لايرثون أهلهُم .. وأن على كل هذه الحالات التى تمْلك بالفِعل .. أن تقوم خِلال 6 شُهور من صُدور القانون ،  ببيع كل أمْلاكِها لمِصريين من أم وأب مِصرى !!.. وفى حَالة عَدم البَيع خلال هذه الفترة .. سَتقوم الحُكومَة بالتحَفظ أو مُصَادَرة هذه المُمتلكات ، وتشكِيل لجْنة حُكومِيَّة لِتحدِيد قِيمة هذه المُمتلكات لِتعويض أصحابها !!!!!!!!!!!

            طبعاً أنت مش مِصَدَق !! وفاتح بُقك على الآخـــــــر ( مُذبَهِلاً ) .. علشان كِدَه أنا حَددت لك القانون وتاريخ  نشْرُه علشان تتأكد بنفسَك !!

       بالذمَة ياإخواننا دِى مش حاجة تقرف ؟ ففى الوقت اللى عايزين نجَمَّع ونلِم شَمْل  المِصريين اللى بَرَّه مِصر ، للمُساهَمة فى تنمِيَّة ورُقِىّ بَلدهم .. نِلاقى الحُكومة (الذكية جداً)  بتطرُد المِصريين اللى جُوَه .. مِصريين تِعبوا وشِقيُوا سِنين طويلة بَرة مِصر أو دَاخِلها .. وشَاءت ظرُوفهم المُختلفة الزوَاج من عَربيَّة أو أجنبيَّة .. ولأنهُم أوفيَاء لوَطنِهُم  فقد شَالوا بَعض هَمَّهُ وعائلاتهم هِيلا بيلا  وتوَجهُوا لِسَيناء ، للإستثمار فيها وقت أن كان نِصف المِصريين لا يعرفونها إلا على الخَريطة .. غامَرُوا بفلوسِهم ورَاحتهم وأروَاحهم لِيُعَمّرُوا مِصر .. ولِيَكونوا من أوائل المُستثمِرين المُغامرين فى سَيناء ..

وفعلاً كانوا النوَاة الأولى اللى إتبنت عليها المَنظومَة السِياحيَة الرائعة فى سَيناء .. وكلهم بلا إستثناء كان لِزوجاتهم الفضل الكبير فى إضفاء المِصداقية على مَشروعاتهم لِدَى أهل بلدها .. بل لِدَى المِصريين أيضاً ( لأنهُم يُصدِقون الأجانب أكتر ! ) .. وكان لهن الفضل فى الجَذب السِياحى لِمُدنِنا السِياحِيَّة .

      والسُؤال اللى لازم ييجى على بالك : هُمَّه دُول مش مِصريين ؟ .. ولا يَعنى علشان أمه ولا أبوه مش مِصرى يبقىَ نِعاقبُه ونحرمُه من حُقوقه الدُستوريَة ؟ .. أو أتجوز أجنبيَّة أو عربيَّة يبقىَ لازم نِطلَع عِين اللى خلفوه  علشان أتجوز واحدَة مش مصريَّة ؟ ولازم نعاقبُه ونحرمُه من مُمتلكاته !! أو وَاحد قعَد فى أمريكا مثلاً 20 سنة وحصل على الجنسيَّة الأمريكية مع الإحتفاظ بجنسيّته المِصرية .. يبقىَ نعاقبُه لِحصُوله على جنسيَّة تانية !! ونفرّجُه بقىَ نتيجة أفعاله وتِتاخِد كل أملاكه واللى حِيلته .. وولادُه كمان يتحرمُوا من اللى يملكوه واللى لسه حايملكوه !!  يانهار أسود عليكى يابلد !! إيه الذُل الأزلى اللى إحنا فيه ده ؟ إيه الغباء الحُكومى المُستأسِد ده ؟ بصراحة أنا مابقيتش عارف الحُكومة دى عايزة مِننا إيه ؟ ومخليانى حاسس إن المَطلوب تفريغ مِصر من أهلها .. وتِسَكِّن هى بقىَ  اللى على مَزاجها !!

         ونرجَع للقانون الأسْوَد .. القانون صدر فى 13 سبتمبر 2012 .. والمُهلة 6 شهور من صُدوره يَعنى 13 مارس .. ومع ذلك لم يتم إخطار الناس دِى كلها .. القانون تم الإصطدام فيه بالصُدفة البَحته .. وعند الإستفسار من مُحافظة جنوب سَيناء اللى المَفروض إنها حاتنفذ القانون .. كانت المفاجأة أنهم لا يعلمون أى شىء عن القانون .. مافيش ولا صحيفة أو إعلامى تحدث عن الموضوع  ( لأنهم لايعلمون شيئاً عن القانون ) .. والوَحيد الذى تناول الموضوع هو الأستاذ / جابر القرموطى فى "مانشيت " .. بناءاً على مَقالة الأستاذ / نبيل شَوكت فى الأهرام .. وكأن المفروض على كل المِصريين قراءة الوَقائع المِصرية يومياً للإطلاع على القوانين الجديدة التى صَدرت بالليل  .

         المِصريين اللى حايتضرروا من القانون بالآلاف  .. ويعمل فى مشاريعهم عشرات الآلاف .. ده غير الشقق والمَحلات والمَشروعات الصغيرة اللى بيملكها بعض هؤلاء ..

    وبعد ماالمُتضررين فاقوا من الصَدمة .. أبتدأوا يتصلوا ويجمَّعُوا بعض .. ويناقشوا حايعملوا إيه فى المُصيبة الكبيرة دى ماهو ( ياناوى على قوتِى .. ياناوى على مُوتى ) .. وأنا حاأقولكم الأفكار اللى تم طرحها فى إجتماعاتهم الدائمة .. ناس قالت : أحنا نقفل مشروعاتنا ونسِيب البلد ؟ بس ساعتها الحُكومة برضُة حاتستولى على غنيمَة سهلة !! واحد قال نشتكى لحُكوماتنا بالجنسية التانية لِحفظ حُقوقنا بدال مش عارفين ناخد حُقوقنا على أرضنا .. ناس قالت نرفع قضيَّه مستعجلة .. لكنهم أكتشفوا أن رَفع القضيَّة لازم يكون فى خلال سِتين يُوم من صُدور القانون .. وهُمَّه ماعرفوش إلا من أسبوع وحَقهُم فى التقاضى سَقط خلاص .. فقالوا خلاص نرفع قضايانا بَرَّه مِصر وكل وَاحد يرفع قضيَّة فى بلدُه التانى !! ناس قالت نِحشد عشرات  الآلاف من العاملين فى مشروعاتنا ومعاهم عائلاتهم ، ونتوَجَّه على رَأس مُظاهرة صاخبة ، وإعتصام مفتوح ، أمام الرئاسة ،أو مجلس الوزراء .. ناس مُتشائمة قالت نحرق مشروعاتنا بإيدينا ولا يتاخدش عَرَقنا وتعبنا لِعشرات السَنوات بالعافيَة وغصْب عننا .. والأجتماعات مستمرة فى شرم الشيخ ودهب .. والتصعيد متواصل .. والمتضررين والمتعاطفين بيتضاعف أعدادهم طوال الوقت .. والنية أن يتم إعطاء الفرصة للقضاء المصرى .. وإن لم يفلح ذلك فقد أتفق الجميع على تدويل القضية .. وخبراء القانون الدولى ( الأجانب ) قالوا إن أحتمالات كسب القضية ضد الحكومة المصرية تتعدى الـ 90% مثل كل القضايا التى رُفعت ضد مصر فى المحكمة الدولية والمحاكم الأوربية .

    كتير من الأجانب المُشاركين لِمصريين فى مشروعات مختلفة  بدأوا يطالبوا بالتخارُج من الشراكة .. وأغلبهم بدأ بالفعل البحث عن مكان آخر آمن على فلوسهم وإستثماراتهم

 .. والقانون أضرّ أيضاً بالأجانب المُقيمين ( رسمياً ) .. فقد حرَّم عليهم التمَلك .. وبعد قبولهم على مَضض  قرار حق الإنتفاع لـ 99 سنة  اللى صدر فى آخر أيام حُكومة نظيف ( الذكيَّة برضُه ) .. القانون الجديد خفض المدة لـ 50 سنة !! .

        عايز تفهّمنى أن الإستثمارات حاتزيد فى مِصر بعد الثورة !! هههههههاااااااى .. ياريت تتابع أحسن هُروب المُستثمرين الحاليين من العرب والأجانب .. وآدى الحُكومة بدِماغها اللاسعَة تسعى لِتطفيش المُستثمرين المِصريين

      شرَارة التعريف بالقانون بدأت هنا فى دَهب .. وبرضُه فى دَهب بدأ العمل على تأسيس( إئتلاف أنا مِصرى جداً ) .. لأن هؤلاء المِصريين حاسيين أنهم ناقصين حِتَّه أو نُص مِصريين .. أو مصر يين درجة تانية .. ماخلاص المصريين بقوا  يتقسِّمُوا حسب صاحب المُلك .. ونسيُّوا إن المُلك لله سُبحانه .. فيه مِصريين درجة تالتة  ودُوول أهالى النوبة وسَيناء .. وأى حُقوق لهم مَعدُومة لأنهم درجة تالتة!! والدرجة التالتة دى للعَبيد.. والعَبيد لا حُقوق لهم !! والأقباط دُوول مِصريين درجة تانية لأنهم كَفرَة ملاعِين.. ومعاهم الليبراليين والعِلمانيين والمُثقفين وأى حَد من الفاهمِين  !!

 أما المُواطنين المِصريين الحقيقيين  ،فهم أصحاب الدِماء النبيلة الزرقاء من الإخوان المُسلمين ، وغلمانهم ومُريديهم من المُؤيدين ، والمُنافقين ، ومسَّاحِين الجُوخ ، وأصحاب المَصالح ، والمُتحَولِين .. واللى على نياتهُم .. والجَهَلة المُتخلفين اللى ماشيين ورا الرايجة بدون تفكير ومعاهم طبعا أصحاب الولاء والطاعة .

وهنا لقوا نفسهُم بيصرخوا بأعلى صَوت .. وقلوبهم قبل حَناجرهُم بتصرُخ وتقول .. إحنا  مِصريين غصب عنكم .. إحنا مِصريين أكتر منكم .. أحنا مصريين جدا جدا .. وتبلور صراخهم فى ( إئتلاف أنا مِصرى جداً ) .. كيان جديد أسسُوه لِيدافع عنهم وعن حُقوقهم .. لِيَكون الإئتلاف هو الرَقيب على الثورَة وأهدافها فى سَيناء .. وأن يُؤكد فى أهدافه إن المِصريين كُلهم سَواسِيَّة .. والدُستور القديم وأى دُستور حايطلع ( حتى لو مَسلوق ..زىّ اللى على النار دَه ) ..

 بيقول أنه لافرق بين مِصرى ومِصرى .. وأن الأرض أرضهُم جميعاً .. والوطن وطنهُم جميعاً .. ومِصر مِصرُهم جميعاً .. وليست مِصر للإخوان فقط .. والعجيب فى الموضوع إن مِصريين تانيين كِتير من كُل سَيناء إنضمُوا للإئتلاف .. لِشعورهِم أن مِصريتهُم بتنسَحِب منهُم هُمَّه كمان .. وإن جنسيَّات المِصريين القادِمَة حاتكون ياإما إخوانى مِصرى .. أو مِصرى عادى بيقولوا عليه مِصرى بشَرْطَة .. أو مِصرى لما تُفرَج !!


   
صـــلاح إدريـــــــــس
salahedris@gmail.com

مدون بالبلــدى الفصيـــــح
تشريفكم لمدونتى يسعدنى .. ويمتعّكم ، وقد يفيدكم
http://plackprince.blogspot.com/

 

 

 

 

 

 

 

  الرجوع إلى الصفحة الرئيسية

ALmohager_ALyoum

 

ان اردت أن تكون قويا استعمل..

http://superfitnessxl.com

 
 
 
 
 
 

لكل طلباتكم العقارية اتصلوا ب هانى عازر

Call (310) 507-4077

 

 
 
 
 
 
 
 

بيروت تايمز

 

اخبار لبنان

والجالية العربية

فى

www.beiruttimes.com

 

مساحة أعلانية

 

ضع أعلانك هنا

 

 

 

 

Copyright  2009 Almohager ALmasry. All rights reserved.

Site Designed by Media Center