ALmasry-ALmohager

رئيس التحرير : سامي حنا عازر

تأريخ اليوم

 

Editor in Chief: Sami H. Azer,  ESQ

E-Mail: judgesami@ca.rr.com

رقم العدد:  55                          10   نوفمبر/تشرين الثاني 2012

 
 

November  10th  2012                             Issue Number: 55

 

                 جريدة أسبوعية الكترونية تصدر كل يوم سبت  من لوس انجلوس .... أول  جريدة  مصرية  اون  لاين  تغطي اخبار  المهاجر المصري وشقيقه في الوطن  ...بيت لكل مهاجر في اي بقعة من بقاع العالم .. رأى لكل المهاجرين  

 

تنويه: هذه الجريدة لخدمة الجالية المصرية .. وتتقبل هبات من أعضاء الجالية من وقت لآخر

  ALmohager

English

 

الصفحة الرئيسية

رسالة من المحرر

مقالات حرة

الكتــــــــــاب

الأدب

علـــوم

أخبار الجالية

رحلات وتاريخ

الارشيف
آراء وتعليقات
هدايا لخدمة الجالية
أتصل بنا
The Conciliator
الرجوع للعدد الحالي
 
 

كُتّاب

المصرى المهاجر

 

ساندى بتاعنا.. وساندى بتاعهم


اضغط هنا

أ/فاطمة ناعوت
 

فردوس الإخوان الموعود في صندوق القمامة


اضغط هنا

د/سعدالدين ابراهيم
 

سَينــاء .. والحَقيقة المُرَّة !!


اضغط هنا

أ/صلاح إدريس
 

الإمام علي عليه السلام تاريخ وإبداع

 

اضغط هنا

أ/عبدالواحد محمد
 

خواطر
(2)

 

اضغط هنا

رئيس التحرير
 
 

مساحة أعلانية

 

ضع أعلانك هنا

 

 
 

الاستاذ/ صلاح إدريس

كاتب حر ورجل أعمال

salahedris@gmail.com

السيرة الذاتية..أضغط هنا

صلاح إدريس

 

سَينــاء .. والحَقيقة المُرَّة !!

 

السبت،  10 نوفمبر/تشرين الثاني 2012

         أيه حَقيقة  اللى بيحصل فى سَيناء ؟ ..الفيلم  كبير ، وخطير ، ومُهم جداً.. وبالألوان الطبيعية كمان  .. ولأنى نوبى ـ سِيناوى بحُكم إقامتي , فتلاقينى غرقان فى مشاكل سَيناء .. وعايشها أول بأول  .

               كنت مقرر أقلل شوية من حَجم مقالاتى .. وبدأت فعلا .. لكن الموضوع بتاع النهاردة ، مليان تفاصيل ، ودَهاليز ، وزى ماتعودتُم منى لازم أقول لكم  كل  التفاصيل والبيانات اللى بتؤكد كلامى .. ولإنى عامل زى الإيطاليين بأكتب زى مابأتكلم  .. وكلامى  لازم يكون من قلبى  ومُؤمن بيه .. وإلا ماأقولوش ..

           وبأطلب منك قارئى العزيز أن تقرأ مَقالى لآخره وبراحتك خالص وبتركيز شَديد .. ولاحظ إن الكلام اللى فوق السُطور .. أضعافه مابين السُطور .. وأنت وشَطارتك بَقى !ّ!

          مَشاكل سَيناء هى مَشاكل مِصر كلها .. ليه ؟ حاأقولك : ياترى أنت عارف إن شمال سَيناء دلوقتِ بكل مُدنها ،  وقراها ، وجبالها ، مَليانة برجال مُخابرات أمريكية ،  وإسرائيلية  ، وفلسطينية ،  وإنجليزية ،  وقطرية ، وإيرانية  .. ولما بأقولك رَجُل مُخابرات أمريكى أو إنجليزى .. فلازم أوضَح لك إن كل مُخابرات العالم لما تحب تشتغل فى بلد عربى مثلاً  ، أو صينى .. فلازم رجالها يكونوا من أصول عربية  ،  أوشكلهُم عربى وبيعرفوا يتكلموا كل اللهجات العربية  وبطلاقة .. علشان كده ماتقدرش تعرفهم !! أو حتى تصدق إنهم من المُخابرات الأجنبية .. وبرضه فيه جَواسيس كتير من أهل هذه البلد أو تلك  ، يتم تجنيدهم للعمل فى مُخابرات أجنبية  .. ويتم تدريبهُم جيداً..  ويكلفوهم بعمليات مُختلفة فى بلادهم تحت إسم وإشراف ورِعاية  مُخابرات هذه الدُول .

         وتحذير المُخابرات البريطانية والإسرائيلية  لرعاياهم بعَدم الذهاب لسَيناء .. وعلى المُتواجدين حالياً عدم مُغادرة فنادِقهُم .. وعَدم مُغادرَة شَرم الشيخ لأى سَبب .. والعَودة بأسرع مايمكُن .. وطبعاً الدول الأوربية  مش بتكذب على رَعاياها  ولا تِقدر تكذب .. ولا تعرف تكذب أصلاً .. فلما تُحذر رَعاياها من خطر !! يبقى فعلاً فيه خطر وعندهم مَعلومات أكيدة عنه .. والتحذيرين البريطانى والإسرائيلى أكدوا معلوماتى عن وجود مُخابرات كثيرة فى العريش .

             طبعا  حا تسألنى الدَولة المِصرية فين ؟ مش حاأقدر أقولك !! لإنى ببساطة  .. ماأعرفش !! لكن أوعدك أني أدوَّر عليها  ولما ألاقيها حاأقولك فى المَقال اللى جاى أنا لقيت الدَولة فين بالضبط !! لكن أقدر أقولك دلوقتِ  شوية حاجات مُختلفة حصلت وَرا بعضها تخلينا نفكَّر  زى أحمد آدم ونسأل (هو فيه إيه ؟ ).

         1 ـ  أولها إن مافيش دَولة فى العريش .. بدليل سيارات الدَفع الرُباعى الخاصة بجماعات الجهاد الإسلامى المُختلفة والمُتعددة !! تسير ليلاً ونهاراً فى شوارع العريش ورَفح وعليها الأعلام السوداء والخضراء  .. ومافيش ولا حتى عسكرى مُرور ياخد أرقامهم !!  و جماعات الجهاد دى كلها  مُسلحين بأسلحة ثقيلة ومُتوسطة وخفيفة ؟.. يعنى بدءاً من  السيارات المُصفّحة ومُضادات الطائرات والدَبابات   .. ومُروراً بالأربى جى وماشابهُه .. وإنتهاءاً بالرشاشات والمُسدسات .. والكلام ده كان مَوجُود من  فترة مابعد الثورة .. ولكن ليس  بهذه الكمية والنوعية ومعاهم هذه  البجاحَة والعَنجهيَة اللى بدأت تكبر بعد مَقتل الـ 17 جندى مصرى أثناء إفطارهم فى رَمضان .. ووقتها طِلع الرئيس والحُكومة كلها وقالولنا :  لن نسكُت على دِماء شُهدائنا .. سَنقتص من المُجرمين .. وأنت عارف بَقى الكلام اللى أتقال وَقتها وبيتقال فى كل وَقت .. ( ومش عايز أكررُه علشان  عندى بَوادِر قرحَة فى المَعدة )  .. المُهم إنه بَقالنا أكتر من 4 شُهور دلوقتِ  ومافيش ولا حِس ولا خبَر .. وكأن اللى ماتوا دُول شويَّة كِلاب  أكلتهم القُراضَة .. ليه  لأنهم جُنود غلابَة فقراء ..... لا  هُم  وِلاد ناس مُهمة  ،  أو إخوانية مَسئُولة  ، أو حتى من الثوار اللى مُمكن يتكلموا فى الإعلام ويفضحُوهم .. وطالما  غلابة يبقى دُووووس ولا يهمَك !! ..  وبعد مَقتل الشباب الـ 17 ..قامت  المجمُوعة اللى قتلتهم بسرقة عَربيَّة مُصفحة من عَربيَّات الشرطة وأخترقت الحُدود المِصرية الإسرائيلية .. وفى أول 300 متر دَاخِل إسرائيل ضربتهم إسرائيل بصاروخ من طيَّارة بدون طيَّار حرقتهُم داخل عربيَّتهم بالكامل .. ثم قامت إسرائيل بتسليم الجًثث الـ 8 لمِصر   منهم 7 مُتفحِمين وواحِدة سَليمة .. والمَسئولين قالولنا برضه إنهم حايكشفوا عن شخصيات وجنسيات القتلة  خلال أيام .. وبرضُه مافيش ولا حِس ولا خبَر !!

 

         2 ـ    ألتقىَ  الرئيس مُرسِى فى لِقاء شَعبى ( مع جماعة إخوان العريش ) مش ( أهل وقبائل سَيناء) وقال فى ختام اللِقاء وبجوارَهُ المُحافظ ونائب المُحافظ الإخوانى ( كباقى نواب المُحافظين فى أغلب مُحافظات مِصر الآن )  : اللى محتاج منكم أى حاجة أو عنده أى موضوع يقدمها لنائب المُحافظ وهو حايتصل بى فوراً !! والمُحافظ  واقف زى الباشا  وكأن الرئيس بيتكلم عن مُحافظ كاليفورنيا ( شوارزنجر ) ولما حاول المُحافظ  الحديث عن الأنفاق  قاطعه الرئيس قائلاً : الأنفاق خلاص أتقفلت كلها !!!! وأنا بأقول للرئيس  مافيش ولا نفق واحد أتقفل .. والـ 1400 نفق يعملون ضِعف الأول مِائة مرَّة .. وحتى الـ 40 نفق اللى أتقفلوا لخزى العِين  وَقتها !! .. رجعوا أتفتحوا وشَغالين زى الفل .. ودلوقتِ فيه أنفاق مُكيَّفة الهواء .. وقضبان حديدية تسير عليها العَربات التى تنقل البضائع .. وحجم البضائع اللى بتتهرب عبر الأنفاق .. من حديد وأسمنت وسُولار وبنزين وأسلحة وسيارات مَسروقة ، ومواد غذائية  وغيرها من البضائع تضاعفت عشرات المرات

          3 ـ  يوجد بالعريش عدد لايقل عن 55 من الجماعات الإسلامية المختلفة  مثل التكفير والهجرة .. ومُجاهدى سَيناء .. ومُجاهدى الإسلام .. والقاعِدَة .. وغيرهم ..( وأنا مش عارف مجاهدى الإسلام دول بيجاهدوا ضد المسلمين ليه. وجماعة التكفير والهجرة بتكْفّر المسلمين ليه ورب العِزة حرم تكفير المسلم  ؟؟.. بصراحة مش فاهم ة!! ) ..وسَيناء  الآن هى المَلاذ الآمن  للجماعات الإسلامية فى العالم .. فيوجد عدة جماعات جهادية يَمنيَة .. ومثلهم لِيبية .. ومثلهم مائة مرَّة فلسطينية ( حماسية ) .. والدعوة الآن مفتوحة لكل الجماعات الإسلامية فى الصُومال وباكستان وأفغانستان بالتوجه إلى سَيناء  لأنها ستكون المَلاذ الآمن ومَوطِن الخِلافة !!

       4 ـ أهل غزة ( حماس تحديدا ) يتجولون فى العريش ورَفح والشيخ زويد  وغيرهم عادى جداً .. ويَعبُرون الأنفاق كأنهم يَعبرُون كوبرى ستانلى .. وجماعة الجهاد الإسلامى  المصرى .. عندهم  قصر كبير يملكونه  داخل غزة .. يقضون فيه الويك إند  .. وكل الجماعات الإسلامية لدَيها مَنازل داخل غزة وتحت حِراسة ورعاية حَماس .. فلا فرق الآن  بين غزة وشمال سَيناء .

       5 ـ   كمين الرسات بالعريش  أتهاجم بالأسلحة الثقيلة 42 مرة .. تخيل 42 مرة !!   ومافيش ولا مَرَّة أتمسك وَاحِد من المُهاجمين !! أو حتى إتعوَّر فى ضُفر رجله الصَغير!! ..

      6 ـ من إسبوع أتهاجمت عَربيَة نجدَة وتم قتل 3 جُنود شُرطة  .. و2 من المُسلحين  .. وبرضُه ماحدِش إتمسَك ..لكن يطلع علينا القاتل !! واحد أسمه  ( أبومُصعب )  وبيقول عن نفسه قائد الجناح العسكرى بجماعة الجهاد الإسلامى بيقول فى بيان رَسمى  ،وزعه على كل الصحف والقنوات ، إنه كان فى صُحبة  بعض الضيوف الأعزاء  من ليبيا .. وكانوا فى أرض مُجاورة لزمام العريش  .. وهم ــ  وبراءة الأطفال فى عينيهم ــ  كانوا يتمشون بالسيارات فطلعت عليهم دورية  للشرطة وأطلقت عليهم النار بدون أى سبب !!.. مما أصاب الضيف  الليبى المُهم الشيخ مُعاذ الترهونى  .. مما جعلهم يطلقون النار على الشُرطة .. وقد تأكدوا من مَوت الجُنود الثلاثة !! وفى آخر البيان بيقول ويقسُم بالله العظيم  إن  لو ضَيفه المُهم الشيخ مُعاذ الترهونى  مَات  نتيجة إصابته يبقىَ الدُنيا حاتوَلع فى سَيناء ومافيش شُرطى ولا ضابط  ، ضامن أو آمن على حياته !! وسَنعلِن الحَرب على الشُرطة ... ( وكأن إرهاب الثمانينات وأوائل التسعينات رَجع تانى !! ).. وبرضُه لا فيه حَد طِلع وعَلق .. وقال لنا مين أبومصعب ده ؟ وهل كلامه صحيح ؟ وإذا ماكانش صحيح فإيه هو الصحيح ؟  لكن لأننا شَعب بالوظة .. وناس بادنجان .. يبقى مانستاهلش لا توضيح ولا شرح .. وكل واحد يفهم اللى يفهمه !!

      7 ــ  يوم الثلاثاء ( بعدها بيومين )  تم الهجوم على مُفتش الداخلية فى سَيناء العقيد / سليم الجمال وهو مُغادر لِكمين ( قمَر الزمان بالعريش ) .. وأصيب فى كتفه وفكه  إصابات خطيرة جداً .. وهو لابس مَدنى .. والعربية ملاكى مش شُرطة .. بما يعنى إن هناك رَصد كامل .

        8 ــ عايز أفكّركُم أن قبلهم وبالتحديد فى مُنتصف فبراير 2012 تم إختطاف 3 ضُباط وأمين شُرطة .. وسَمِعنا كتير عن عودتهم .. ولغاية دلوقت مارجعوش .. رغم إن اللى خطفهم وهو مُمتاز دَغمَش  زعيم الجيش الإسلامى فى غزة .. قال أنهم عندُه .. وإنه مُستعد للإفراج عنهم  بشروط مُحددة وقدَم 12 مَطلب للمُخابرات المِصرية !! منهم الإفراج عن بعض المَقبوض عليهم من جيش الإسلام أولهم محمد محمد الظواهرى !!و  وطلبات أخرى كلها مُخابراتية .. فلا المُخابرات المِصرية رَدت  ، أو خلصَت الموضوع .. ولا هو ساب الرَهائن .. ولا قامت ثورة فى مِصر لأن 4 من ولادها مَخطوفين بيَد الأشقاء .. وماشوفناش أى  تحرُك ..أونحرَرَه .. أوحِرص على أولادنا من  وَزير الداخلية أو رئيس الوزراء أو الرئيس  .. ولغاية دلوقتِ مافيش أى أخبار ..  وعائلات المُختطفين بتتحسّبِن ليل ونهار على مِصر واللى بيحكموها ... وبيفكروا يناشدوا الحكومة الإسرائيلية بمساعدتهم فى الإفراج عن الضباط المصريين من أيدى مخنطفيهم أشقائنا الفلسطينيين . 

    9 ــ  مَساجين حماس اللى هربوا من السُجون المِصرية بعد الثورة مُباشرة .. وكانت عمليات الهُروب مُخططة ومَرسومة بعناية لِدَرجة أن السَيَّارات الفلسطينية كانت تنتظرخارج أسوار السُجون فى نفس التوقيت  .. وتم تهريب المَساجين الفلسطينيين جميعاً .. ومعهم مجموعة كبيرة من الإسلاميين المصريين وغيرهم .. وسافرت العربيات لأسوان والسودان ثم غزة .. أو عبر أنفاق  العريش لداخل إسرائيل و منها لغزة .. وأتقتل اللواء محمد البطران ..  قائد السجون وَقتها وهو يؤدى واجبه .. عايز أعرف مين هُمَه المَساجين دُول ؟ ومارجعوش ليه ؟ ــ حتى لإعادة مُحاكمتهم ــ أو حتى الإعلان عن الحِكاية كلها بشفافية وصِدق ، ومانعطيش فرصَة للإشاعات والكلام الكتير حَول تآخِى حماس والإخوان المَعروف .. وتخطيطهما ومُساعداتهما لبعضهما فى عمليات الهجوم على كل  أقسام  الشرطة فى وقت واحد مُحدد.. ثم تلاها مُباشرة الهُجوم على السُجون  وبَرضُه فى توقيت وَاحِد مُحَدد !!!

              10 ــ الهُجوم على نقط المُراقبة الدَولية .. وقطع الطرق الدَولية .. وغيرها .. وغيرها من الإنفلات الأمنى اللى يخليك تسأل هى عملية نِسر فين ؟ وإيه نتايجها ؟  والظاهر إن النِسر طار وهرب أو طلع عصفورة غلبانة  .. وكل ماتسأل عن نتيجة العملية نِسر يقولوك  حرصاً على سرية التحقيقات ،  وعدم هُروب باقى المُتهمين ،  مش حانقدر نقول دلوقتِ !! طيب حاتقولى أمتى ياعَم نِسر .. يقولك قريباً .. وفى الآخر قالوا أنهم أنهوا العملية نِسر  .. وبدأوا العملية سَيناء  .. ولو حَد فاهم حاجة يقوللى !!

11 ـ  إيه حكاية الإتجار بالبشَر  عبر سَيناء لإسرائيل ؟ وليه  الدَولة تسكُت وتغمَّض على عُبوديَة البشَر ؟!!! (وعلى فكرة الإسلاميين  حَريصون على السَماح بالإبقاء على الإتجار بالرَقيق فى الدُستور الجديد !!)

 12 ــ عايز رَاجل كِده وشَمْلول يطلع يُقوللى كام ضابط وجندى شرطة أتقتلوا فى سَيناء  من يوم الثورة ولِغاية دلوقتِ .. و إحنا عارفين  إن عَمليات القتل بيتم التخطيط لها فى غزة .. ويقوم بالإشراف والمُشاركة فى العَملية  مُجاهدى الجيش الإسلامى بغزة أو إحدى كتائب حماس الأخرى ( وماأكثرها !! ).. ولا يتم الإعلان عن أى من هذه العَمليات إلا تلك التى تكتشفها الصحافة والإعلام  بالصدفة أو الشَطارة .. وقتها بس  الدَولة بتعلن عن الحادث .. والعمليات التى أُعلن عنها لاتتعدى الـ 30-% من حجم عمليات الإعتداء على الشُرطة الحقيقية .

 13  ــ  تم بحمدالله نشر كامل لفكر الجهادية  الإسلامية .. على أغلبية شباب وصبيان بَدو سَيناء وقبائلها .. وجارى  النشر على البقيَّة من الشَباب .

           14ـ  لو مش عارف أهل سَيناء عايزين أيه ؟  أقولك ياسيدى .. عايزين تنميَّة .. عايزين يتملكوا أراضيهم .. زيّهُم زىّ أى مُواطِن فى مِصر لمَّا بيشترى أرض .. عايزين وَاحِد بَس.. وَاحِد بَس  من ولادهم يدخل النِيابة  ، أو الشُرطة ،  أو الجيش  ، أو حتى يتجند عادى .. عايزين  يلاقوا شُغل لِولادهم اللى وَصلت نِسبة البَطالة فى شمال سَيناء لأكتر من 80% .. عايزين يشعروا بوجود  دَولة تحميهم  ، وتخاف عليهم .. عايزين ظبْط ورَبْط  يخليهم ووِلادهُم مش مَرعوبين فى بيوتهم .. وأى عَيّل يرمى بوُمّبة من بتوع العيد ..  نِسوان البيت كلهم يَرقعوا بالصُوت الحيَّانى  خوفاً وهلعاً .. ومن الآخر كِده أهل سَيناء عايزين يحسُّوا أنهم مِصريين زيّهُم زىّ أى مِصرى فى المُنوفية أو الدَقهليَة أو القاهرة ..

          15 ــ غياب الدَولة والشُرطة رَغم كل اللى حَصل .. واللى بيحصَل .. والجيش وَاقِف يتفرَّج.. لا بيهشّ ولا بينشّ !! .. كل دَه يعطيك إحساس بإن الحِكاية مَقصودة ومتخطط لها .. وأن مِصر مش عايزة سَيناء .. وكأنها لِوَز مُتَضخمة ،  وسُخنة ، وحاتنفجر والحل الأمثل هو عملية جراحية وإستئصالها .. واللى بيحصل دلوقتِ هو عملية إستئصال سَيناء من جَسَد مِصر .

       اللى فات ده كله كان إستعراض لبَعض الأحداث اللى حَصلت وبتحصَل فى سَيناء  .. ولكن ماهو الهَدف ؟ .. وماهى المَحطة الأخيرة اللى عايز  يوصَل لها صاحب المُخطط والفوضى التى تتم الآن على أرض سَيناء ؟

     الحقيقة فيه رَأيين مُختلفين :ـ

         الرأى الأول بيقول أن إسرائيل ومعها المُرَبيَة بتاعتها أمريكا !!  مش حايسمحوا أبداً ، وبأى حال من الأحوال أن يتم تعمير سَيناء أكتر من كِده .. وأن مُنطقة شمال سَيناء خط أحمر شايلينه لِوقت عُوزة .. وكلنا عارفين أن سَيناء جاء ذِكرَها كثيراً فى التورَاة وعلى لِسان مُوسَى عليه السلام  عدة مَرَّات .. واليَهود بيعتبروها الأرض المُباركة .. والأرض التى ستكمل لهم أرض المِيعاد  .. وزىّ ماخططوا لإحتلال فلسطين قبلها بـ 50 سنة .. فلازم نِفُوق  ، ونعرف إن هناك تخطيط  لإعادة إستعمار سَيناء.. ثم مَنحها للفلسطينيين بشروط إسرائيلية بحيث تصبح تحت الولاية الإسرائيلية !! وبكده يبقوا ضربوا عصفورين بحجَر .. الأول أنهم تخلصوا من الصُداع المُزمن اللى أسمه دَولة فلسطين .. والثانى أن سَيناء المُباركة رجعِت لهُم ، وتحت سَيطرتهم  .. علشان الهَدف دَه يتحقق يبقى لازم له تخطيط ورَسم على المَدَى الطويل  !! يبتدوا   يعملوا قلاقِل ومُناوشَات ،  ومَشاكِل  ، علشان  العالم كله يَقلق ويقولولك خلاص يبقىَ نضَع سَيناء تحت الحُكم الدَولى !!  يَعنى تبقىَ تابعَة للأمَم المُتحدة .. ومِصر مالهاش دَعوَة بيها .. وبدأوا يخططوا لمُنطقة تِجارة حُرَّة مِساحتها 30 كم2 طول  ..و30كم2 عَرض  ..  يَعنى مِساحة 900 كم2 على الحُدود الإسرائيلية المِصرية ... وفيه بعض أبناء شمال سَيناء عايزين الحِكاية دى وبيأيدوها  لأنهم مُتخيلين ( ويمكن يكون صَحيح ) أنهم سَينعَمون برخاء وإستقرار إقتصادى وأمْنِى .. وسَيُعامَلون مُعامَلة آدَمِيَّة .. وبصَراحة عندهم حَق  بعد كل اللى شافوه من القرَف والذل والتهمِيش .. والفِكرة إنه بعد تحويل هذه المُنطِقة لمُنطِقة تِجارة حُرَّة تبدأ باقى مُدن شمال سَيناء فى التحَوّل وتبدأ الناس تِمسك فلوس وتعيش عِيشَة حلوة .. وخلال سنوات قليلة يعرفوا الفرق بين حُكم الإسرائيليين والمُجتمع الدَولى  .. وحُكم المصريين ..فينحازوا طبعاً للمُجتمع الدَولى  .. وتضع إسرائيل القرارات والقوانين الدَولية التى تزيد من تحَكُّم قبضتها على سَيناء  .. لِغاية ماييجى يوم مانعرفش فيه سَيناء مِصرية ولا إسرائيلية .. وعلى فكرة إسرائيل عارفة كويس إن الموضوع ده مش حايتم قبل 10 أو 20 أوحتى 30 سنة .. لكن الصيَّاد الشاطِر يصبُر على سِنارته لِغاية ماالسَمَكة تِمسك فى الطُعْم وتبدأ تاكل فيه .. وساعِتها يشد السِنارة فتقع  السَمكة  فى حِجْرُه  صاحيَة بتلعب  بسهولة شَديدة ..هى دى إسرائيل .. وهو دَه تفكيرهم .. وإحنا عارفين كويس إن إسرائيل صيَاد شاطر قوى قوى !! .. ومع ذلك عاملين نفسنا مش شايفين ولا عارفين  ، ولا فاهمين .. يَعنى  بطيخة وفى البلالا  خالص... ( وأنا فى الحقيقة مش مع الرأى ده قوى .. لكنى  لا أستبعده طبعا )

أما الرأى التانى  بيقول .. إن هناك تخطيطاً بين إسلامِيى  غزة ( حماس وجماعاتها  ) وإسلامِيى  مِصر .. وإسلاميى ليبيا ..  بإقامة إمَارة إسلامية فى سَيناء ..  والخِطة تبدأ بأعمال عُنف وإرهاب .. وتواجد عَسكرى مُنظم .. وإستعراض للأسلحة والأفراد والقدرَة على السَيْطرة .. ثم مُطارَدة الشُرطة  ، ومُهاجمتها  حتى تنهى الدَولة تواجُدها والداخلية تماماً فى سَيناء  ويبقىَ فقط الجيش مُمثلاً فى المُخابرات  التى  تعرف كل صغير ة وكبيرة عن بَدو سَيناء بالإسم وكُل التفاصيل .. وتكلف  بدعمها مُهمة الأمن فى سَيناء لِمَشايخ القبائل  لِتقيّد الجيش بإتفاقية كامب ديفيد .. مما يعطى كل الجماعات فى سَيناء حُريَّة للحَركة والعمليات ،  وخِلافه .. ولو نظرت إلى توَغل الجيش الإسلامى بتاع غزة فى أمور العريش .. وتواجُد عَدد من  مُجهادى الإسلام الليبيين .. والفلسطينيين  فى مُدن سَيناء .. وقيامهم بعمليات قتل ونهب وقطع طرق وخطف  .. ومع ذلك لم يتم القبض على وَاحِد فقط منهم .. وكل الدلائل المتوفرة لدى المخابرات والداخلية أن من قام بهذه العمليات  فلسطينيين  من حماس .. وكله بتخطيط وتنفيذ كامل من حَماس وجماعاتها المُختلفة .. بدءاً من قتل الجندى المِصرى وهو فى بُرج الحِر اسَة  من قنَّاص من حَماس مَعْروف بالإسم والعُنوان  !! ولكنه حراً طليقاً حتى الآن .. وصولاً  للعملية الأخيرة الخاصة بالعقيد سِليم الجمال .. ونفس الرأى بيقول إن حُكومتنا رَاضيَة ومَرضيَّة .. وإنها بتميَّع وتِطنِّش وتسَوَّح  فى كُل اللى بيحصل علشان هى عارفه إنه حايحصل !! .. وإن الإمارة الإسلامية  فى هذا المكان الحَيَوى ،  والإستراتيجى ، هو البداية للخلافة الإسلامية  فى الشرق الأوسط  كله  .. ولأن كل مُخابرات العالم عارفه المُخطط دَه .. فهى تسعىَ لتنفيذ مُخططاتها  التى شرَحتها فى الرَأى الأول .. أو مُحاولة  تقريب الرأيين وإتفاق المَصالِح بين الرأيين  .. وهذا ماكان يفعله أمير قطر فى غزة  فى أكتوبر الماضى .. وسبقه لهُناك   تابعهُ ورَئيس وزرَائه ( مع إن ماحَدش عارف مين الأمير الحقيقى ومين التابع !! ) ..

         فين بقىَ المِصريين أصحاب الأرض من الموضوع ده ؟ مِصريين إيه ياعَم  .. لما يصحُوا من غيْبوبة الخِلاف ، والتناحُر ، والسِباب ،  اللى هُمَّه فيها أبقىَ أبعتهومللى وأنا أرَاضيهم !!

     وماحَدش يقوللى أنت ضِد الإسلام والمُسلمين .. والشَرع والشَريعة .. والخِلافة الإسلامية .. ويفكَّرنى بعُمر بن الخطاب وعَمْرو بن العاص .. لا  ياأخويا أنت وهو ..  أنا لا ضِد الإسلام .. ولا المُسلمين  .. ولا الخِلافة  الإسلامية .. لكن ضِد الغباء والأغبياء .. ضِد الحُكومات والشعوب اللى مابيشوفوش غير تحت رجليهم  !! ضِد الجُبناء اللى خايفين من أى مُواجَهة مع أى حَد !! ضِد كُل من يستخدم الإسلام والدين  لِتبرير أعمال إرهابية وإجرامِيَّة  غالباً مابيكون ضحاياها  ناس غلبانه وفقيرة وبريئة .. ومالهاش أى علاقة بالموضوع أو أصحاب القرار  !!

       أنا عارف إنى سَوّدت الدُنيا فى وجوهِكم .. وكتير من المَعلومات والأحداث اللى قلتها كِتير مُنكم مايعرفوهاش  .. أرجوكم سامحونى .. وماتزعلوش منى  فالجرح المُلوث لابُد من تنظيفة وتطهيره جيداً  حتى يلتئم على نظافة .. و دلوقت الكُورة فى مَلعَبك قارئى العَزيز .. ياترى إنت مع الرأى الأول ولا التانى ؟ ولا عندك رأى تالت ؟   


صـــلاح إدريـــــــــس
salahedris@gmail.com

مدون بالبلــدى الفصيـــــح
تشريفكم لمدونتى يسعدنى .. ويمتعّكم ، وقد يفيدكم
http://plackprince.blogspot.com/

 

 

 

 

 

 

 

  الرجوع إلى الصفحة الرئيسية

ALmohager_ALyoum

 

ان اردت أن تكون قويا استعمل..

http://superfitnessxl.com

 
 
 
 
 
 

لكل طلباتكم العقارية اتصلوا ب هانى عازر

Call (310) 507-4077

 

 
 
 
 
 
 
 

بيروت تايمز

 

اخبار لبنان

والجالية العربية

فى

www.beiruttimes.com

 

مساحة أعلانية

 

ضع أعلانك هنا

 

 

 

 

Copyright  2009 Almohager ALmasry. All rights reserved.

Site Designed by Media Center